幾年前，機緣巧合之際，開始第一次教自在人生自學計劃入面嘅一個美化家居課程。相信好多人都認識呢個專為婦女而設嘅計劃，由政府，公開大學同一D社區中心或者教會合辦；目的當然離唔開鼓勵市民，特別係退休婦女或者主婦、新來港人士等有個持續進修嘅機會啦，最近連男生都收埋，好熱鬧。
不知不覺間，眨吓眼，斷斷續續咁已經踏入第三年教學生涯。
原本諗住係工餘時間以外，一方面認識多D冇利益關係嘅人，平衡吓生活 :D，另一方面又可以將自己熟識嘅室內設計知識同同學分享吓。初時以為已經係成人嘅同學們都係係咁意，柴娃娃搵D嘢學吓，消磨吓時間；不過真係估佢哋唔到，大部份同學唔單只唔係玩玩吓，好專心甚至好認真咁抄筆記，都令我幾意外......即係我都唔可以hea 教，要認認真真啦 :P
另外最有意思嘅係，有唔少同學係我嘅長輩，初初聽佢哋叫我一聲＂老師＂，真係有D＂唔敢當＂嘅感覺；而老實講，或許真係因為係老一脫人，大部份都好有禮貌，令我突然搵番失落咗好一陣子嘅＂尊師重道＂感覺，好珍貴！
你估係課堂上最多人問嘅係咩嘢問題吖？（截至2017年第三個學期止）
第三位：做個升高嘅地台儲物，你話好唔好呀?！
第二位：你覺得地面做瓷磚定係木地板好呀？
第一位 ：究竟牆身油漆好定貼牆紙好呢？
呢幾條差不多係我嘅必答題 :D
短短幾年間遇過唔少類型嘅同學，同埋亦親身體會到一般用家其實最關注嘅裝修疑慮；每當我見到佢哋因為學會一D新知識又或者我為佢地解答咗疑團嘅嗰種神情，感覺好滿足。特別係佢哋係完成生平第一次繪畫平面圖嘅時候，眼前一個個既驚又興奮，好似返到小學生時期嘅佢哋，真係好可愛。所以不經不覺間，我亦將更多時間投放係教學當中，我諗，係時候份正職要轉兼職啦！
由於呢個計劃，老師全部算係義務性質，所以人工或者講成車馬費更適合。加上我係遊走較偏遠地區，真係＂車馬費＂唔慳得，所以身邊大部份親朋戚友其實唔多支持我此舉.....不過有樣好，就係設計師總係有佢哋嘅＂固執＂哈哈！而佢哋都知我份人，就係咁，2018年應該會遊走於五個地區三個課程當中，享受並重新學習＂為人師表＂呢份＂正職＂，期待！
